Kritisismo sa Duterte-nomics

 Resolusyon Blg. 16: Kritisismo sa Duterte-nomics

Yayamang:

Ang balangkas ng Duterte-nomics ay hindi naiiba sa patakarang pang-ekonomya ng nagdaang rehimen – ang neoliberal na doktrina, na salalayan ng mga patakaran ng liberalisasyon, deregulasyon, pribatisasyon at pleksibilisasyon sa paggawa;

Ang disensyo nito ay palasak na “trickle down theory”, ang pag-unlad ng negosyo at pagpapalago sa yaman ng bansa hindi ang redistribusyon ng yaman, na para bang umuulan ang ganansya sa mga mahihirap habang lumalaki ang yamang panlipunan;

Ang “build, build, build” ng Duterte-nomics ay nasa kapakinabangan ng mga kapitalista – mula sa konstruksyon ng mga proyekto, sa pagpipinansya nito, at hanggang sa epekto nitong pagtaas sa halaga ng lupa kapag natapos na ang proyektong imprastraktura;

Ang pondo para dito ay kukunin ng 70% sa pribadong sektor (BDO ni Henry Sy, BPI ni Ayala, PNB ni Lucio Tan, atbp.) at 30% mula sa official development assistance, na utang mula sa dayuhang mga gobyerno’t bangko;

Ang outstanding debt ng bansa ay sumisirit, at ang pagbabayad nito ay magiging pabigat sa pondo ng gobyerno kapag nag-mature na ang mga utang matapos ang takdang panahon, halimbawa 10 taon; at,

Para kunin ang kumpyansa ng mga pag-uutangan, babaguhin ng gobyerno ang sistema ng pagbubuwis – mula sa kita tungo sa pagkonsumo,  sa pamamagitan ng Tax Reform for Acceleration and Inclusion), na magreresulta sa mas mataas na mga presyo at mas mabigat ng tax burden sa mga mahihirap;  

Kung gayon, nagpasya ang BMP Congress na ang paglalantad sa Duterte-nomics sa isa sa mayor na gawain para tuluyang mabulgar ang makakapitalistang karakter ng rehimen; at dahil dito, ay kailangan itong paunlarin batay sa kongkretong mga epekto sa araw-araw na buhay ng masang manggagawa.