Kampanya para sa Pabahay (Affordable Mass Housing) at Panlipunang Serbisyo

 Resolusyon Blg. 4: Kampanya para sa Pabahay (Affordable Mass Housing) at Panlipunang Serbisyo

Yayamang:

Karapatan ng mamamayan ang abot-kaya at ligtas na pabahay, ayon sa 1987 Constitution;

Ang enabling law ay ang Urban Development Housing Act (UDHA), na ang balangkas ay ang pagwawalis ng mga maralitang lungsod sa mga liblib na eryang sub-urban, tungo sa mga eryang  relokasyon – na sa karanasan ay hindi ikinunsidera ang mga pangangailangan ng mga nilipat na maralita para sa empleyo, edukasyon, kalusugan, transportasyon, komersyo, atbp.;

Ang proyektong “build, build, build” ni Duterte ay magtataas sa presyo ng lupa sa mga syudad at kalapit probinsya, na magtutulak sa mga pribadong nagmamay-ari ng lupa na pwersahang alisin ang mga maralita sa kanilang mga pag-aari; ito rin ang magtutulak sa gobyerno – nasyunal at local government unit – na ibenta ang mga public land para sa mga real estate developer gaya ng SMDC ni Henry Sy, Robinsons Land ni Gokongwei, Ayala Land ni Ayala, Camella ni Manny Villar, atbp.;

Ang proyektong pabahay ng gobyerno ay nakadisenyo para pagtubuan ng mga bangko na nag-aalok ng pinansya sa iba’t ibang ahensya na nakatuon sa problema ng pabahay. Ito ang nagtutulak sa pagbabanta ng ebiksyon kahit sa mga nakatira sa low-cost at socialized housing projects na hindi nakakapagbayad ng kanilang amortisasyon;

Ang paglikas ng mga maralita sa mga syudad ay paglikas ng libo-libong mga manggagawa sa serbisyo, na siyang nagpapaandar sa komersyo sa mga sentrong urban.  

Ang isyu ng pabahay ay hindi lamang suliranin ng sektor ng maralitang lungsod kundi maging ng mga sahurang manggagawa.

Dahil dito, ipagpapatuloy ng BMP ang kampanyang pabahay upang mabalangkas ang isang programa sa pabahay na tunay na kumakalinga sa karapatan at kagalingan ng mga maralita – sa anyo ng paghamon ng pagbabago sa rehimeng Duterte sa usapin ng pabahay.